Полипи

Полипи

Полипите се новообразувања со епително потекло, кои во најголемиот број случаи се бенигни. Во гинекологијата, најчесто се среќаваат два вида полипи: цервикален полип (на грлото на матката) и ендометријален полип (во маточната празнина).

 
Цервикален полип

Цервикалниот полип може да се визуелизира при рутински гинеколошки преглед со спекулум. Тој потекнува од слузницата на цервикалниот канал и често благо излегува надвор од надворешниот отвор на грлото на матката. Во повеќето случаи, полипот е со мали димензии, но во одредени ситуации може да достигне неколку сантиметри.

Клинички, цервикалните полипи може да се манифестираат со:

• Крварење при сексуален однос
• Зголемување за време на бременост, што може да доведе до генитално крварење

Во најголем дел од случаите, цервикалните полипи лесно се отстрануваат при гинеколошки преглед без да предизвикаат непријатност. По отстранувањето, примерокот мора да се испрати на хистолошка анализа.
 
Ендометријален полип

Ендометријалниот полип потекнува од слузницата (ендометриумот) на маточната празнина. Неговото формирање најчесто е поврзано со состојби кои доведуваат до зголемено ниво на естроген (хиперестрогенемија). Фактори на ризик за негово појавување се:

• Прекумерна телесна тежина
• Контролирана оваријална хиперстимулација
• Перименопауза
• Употреба на одредени лекови за рак на дојка (Тамоксифен)

Клинички, ендометријалните полипи може да се манифестираат со:

• Обилни менструални циклуси
• Крварење помеѓу две менструации
• Вагинално крварење во менопауза
• Потешкотии при зачнувањето (неплодност)

Дијагнозата најчесто се поставува во првите денови по завршувањето на менструалниот циклус со трансвагинален ултразвук, кој овозможува јасна визуелизација на полипот во маточната празнина. Доплер ултразвукот може да ја прикаже и крвната циркулација што го снабдува полипот. Друг ефикасен метод за дијагностика е хистеросонографија, каде со помош на физиолошки раствор и трансвагинален ултразвук се добива одлична визуелизација на полипот.
 
Лекување на ендометријалниот полип

Откако ќе се дијагностицира ендометријален полип, можно е да се почека неколку менструални циклуси за евентуално спонтано исчезнување. Во повеќето случаи, тоа не се случува и се препорачува хируршко отстранување.

Златен стандард за отстранување на ендометријалните полипи останува хистероскопијата, која овозможува прецизно отстранување под директна визуелна контрола. Примерокот од полипот секогаш се испраќа на хистолошка анализа. Офис хистероскопијата е минимално инвазивна алтернативна метода каде со тенка камера преку грлото на матката се пристапува до маточната празнина без потреба од ширење на цервикалниот канал. Главната предност е што пациентката не мора да биде под општа анестезија.

Во Болница Плодност нудиме целосен спектар на испитувања за дијагноза и третман на цервикални и ендометријални полипи. Нашите специјалисти користат најсовремена медицинска опрема за квалитетна и прецизна дијагноза.
 
Контактирајте не за повеќе информации

Закажете го вашиот гинеколошки преглед во Болница Плодност и осигурете се дека вашето здравје е во најдобрите раце. За повеќе информации, јавете се на нашиот контакт центар на телефонскиот број +389 47 208 880